بسم اللة نبدا
1
طريقة عمل البطيخ
---------------
بعد صلاة الجمعة
بص من البلكونة
اول ما الصلاة تخلص هاتلاقى فجاة بياعين البطيخ بيندهوا على البطيخ بتاعهم بصوت عالى مش هاتعرف تميز هما بيقولوا ايه
المهم
نادى على عاشور البواب بتاعك وقوله يجيبلك بطيخة حمرا
(نبه جدا على كلمة حمرا دى لان احيانا لما مش بتقوله كدة بيجيبلك بطيخة خضرا)
هايطلعلك البطيخة
افتحله الباب وخدها منه
وانت وذوقك بقى يا اما تشوفه بأى حاجة يا اما بقى تقوله يلا غور من وشى
(يستحسن تناوله اى حاجة احسن يرميلك البطيخة فى الارض)
(((دى اخطر مرحلة فى مراحل طبخ البطيخة)))
هاتاخد البطيخة
وتجيب سكينة
وتقسم البطيخة نصين
وبعدين تمسك كل نص وتقسمه حتت حتت
وبالهنا والشفا
(((ملحوظة هامة : القلب بتاع البطيخة بس هو اللى بيتاكل عشان فى ناس ممكن تاكل القشر اللى برة)))
2
طريقة عمل البلح
--------------
اول حاجة تحدد نوع البلح اللى انت عاوزه
فى بلح احمر وبلح اسود وبلح بمبى
(((وسعت منى مش كدة؟؟؟)))
فى بلح رملى وبلح امهات وبلح ابهات
(((أخرس خالص مش كدة؟؟؟)))
المهم
اول حاجة نقرر هايكون ايه نوع البلح
ومعايير الاختيار غالبا لازم تكون الشكل (يعنى بتلاقى البنات بتاكل بلح بمبى او امهات والولاد رملى او ابهات وكدة يعنى) بس مش مهم الشكل
المهم السعر
الارخص هاته
تجيب البلح
ولو كان بقشر يبقى لازم تقشره الاول
ولو كان من غير قشر برضه لازم تقشره انت هاتتفزلك ولا ايه؟
ماينفعش؟ اتصرف
المهم تقشره وخلاص
الخطوة التالية
تاكله وبالهنا وبالشفا
(ملحوظة : فى ناس بتحطه فى ساندويتشات وتاكله وغالبا بيكون نوعه بلح اسود)
3
طريقة عمل العنب العنب العنب
--------------
اول حاجة تجيبى العنب من العنباتى
والعنب انواع
فى عنب بناتى وعنب صبيانى
اوعى تجيبى الصبيانى احسن مش حلو
هاتى البناتى
اغسليه : يعنى حطيه تحت الحنفية
وياريت تحطيه تحت الحنفية فترة من خمس لست دقايق ونص
وفصصيه : يعنى فصصيه
وامسكيه : يعنى امسكيه
بس اوعى يقع منك والنبى
وبعدين كليه بالهنا والشفا
فلنكتفى بهذا القدر وسوف نواصل اذا كان هناك اقبال على الاكل وسوف نلبى رغباتكم الطبخية ان شاء الله
الأحد يوليو 06, 2008 9:27 pm
